A1News.am-Հայ տղամարդու սպանության գործով մեղադրյալ 23-ամյա Եգոր Կոմարովի նկատմամբ խափանման միջոց է ընտրվել չհեռանալու մասին ստորագրությունը:
Այս մասին հայտնում է «Ֆոնտանկան»՝ հղում անելով Լենինգրադի մարզի Քննչական կոմիտեին։
Ըստ քննիչների՝ վարորդը սպանությանը չի մասնակցել և մեղավոր է միայն հանցագործությունը թաքցնելու մեջ։ Նրա երկու հանցակիցները ձերբակալվել են։ Նրանք չեն հերքում իրենց մեղքը։
Հիշեցնենք, որ նոյեմբերի 20-ի վաղ առավոտյան Սանկտ Պետերբուրգի մերձակայքում գտնվող Ա-121 ավտոճանապարհին տեղի էր ունեցել ՃՏՊ։ Mitsubishi Galant մակնիշի ավտոմեքենան մխրճվել էր կանգառի մեջ, ինչի հետևանքով բեռնախցիկից դուրս էր ընկել 50-ամյա երևանցի Արկադի Ղազինյանի դին:
Մեքենայում գտնվող երեք երիտասարդները դուրս էին վազել մեքենայից և փորձել էին թաքնվել անտառում։ Շուտով նրանց բերման էին ենթարկել։ Հարցաքննության ժամանակ նրանք խոստովանել են, որ դիակը տանում էին ավտոտնակի կոոպերատիվից։ Սպանության շարժառիթը, նրանց խոսքով, վրեժխնդրությունն է եղել։
Ձերբակալվածներից մեկը խոստովանել է մեկ այլ հանցագործություն. նրա խոսքով՝ մեկ տարի առաջ այգում անցորդի է սպանել՝ մարդու միս համտեսելու համար։ Դրանից հետո նա մի ամբողջ տարի թաքնվել է ձեղնահարկում։
