A1News.am-Ամբողջ աշխարհում ՆՈՅԵՄԲԵՐԻ 17-ը նշվում է որպես ՈՒՍԱՆՈՂՈՒԹՅԱՆ ՄԻՋԱԶԳԱՅԻՆ ՕՐ: Եվ հենց այս տոնին ընդառաջ «ԱՐԱՐՈՂ ՍԵՐՈՒՆԴ» նախաձեռնությունը, որի հիմնական առաքելությունն է նպաստել ազգային արժեքների պահպանմանը, հայեցի դաստիարակության խթանմանը, ինչպես նաև բացահայտել, ուսումնասիրել, բարձրաձայնել երիտասարդներին և ուսանողներին հուզող խնդիրները և գտնել դրանց լուծման ուղիները, ՆՈՅԵՄԲԵՐԻ 14-15-ը Ծաղկաձորում անցկացրեց երկօրյա միջբուհական կոնֆերանս՝ «ՈՒՍԱՆՈՂԱԿԱՆ ԻՆՔՆԱԿԱՌԱՎԱՐՈՒՄ. ԶԱՐԳԱՑՈՒՄՆԵՐ ԵՎ ՄԱՐՏԱՀՐԱՎԵՐՆԵՐ» թեմայով։
Միջբուհական կոնֆերանսին մասնակցեցին 32 ուսանողներ հետևյալ պետական և ոչ պետական բուհերից՝ Երևանի պետական համալսարան, Երևանի պետական բժշկական համալսարան, Վ․ Բրյուսովի անվան պետական համալսարան, Հայաստանի պետական տնտեսագիտական համալսարան, Հայաստանի ազգային պոլիտեխնիկական համալսարան, Հայաստանի Ճարտարապետության և շինարարության ազգային համալսարան, Հայկական պետական մանկավարժական համալսարան, Հայաստանի ազգային ագրարային համալսարան, Երևանի թատրոնի և կինոյի պետական ինստիտուտ, Երևանի պետական կոնսերվատորիա, Հայաստանի Ամերիկյան համալսարան, Հայ-Ռուսական (Սլավոնական) համալսարան, Հայաստանում Ֆրանսիական համալսարան, Եվրոպական համալսարան, Հյուսիսային համալսարան, Գլաձորի համալսարան։
Ծրագրին էին միացել նաև «Ոչ պետական բուհերի ուսանողական կենտրոն» հասարակական կազմակերպության անդամները։ Կոնֆերանսի մասնակիցներն այդ օրերի ընթացքում ոլորտի լավագույն մասնագետների միջոցով ծանոթացան՝
1. առաջնորդության գաղտնիքներին,
2. իմիջի ձևավորման տեխնոլոգիաներին,
3. ուսանողական ինքնակառավարման պատմական զարգացման առանձնահատկություններին,
4. Հայաստանի Հանրապետության և այլ երկրների բուհերում ուսանողական ինքնակառավարման դրսևորումներին․
5. բուհում ուսանողական ինքնակառավարման կառուցվածքին, ձևերին, առանձնահատկություններին, նպատակներին, սկզբունքներին, խնդիրներին և գործառույթներին,
6. կրթության բնագավառի օրենսդրությանը, բուհերում ուսանողական ինքնակառավարմանը, ուսանողների իրավունքներին և պարտականություններին վերաբերող կանոնակարգերին,
7. ուսանողական ինքնակառավարման մարտահրավերներին,
8. ՀՀ երիտասարդական պետական քաղաքականության ռազմավարությանը։ Մասնակիցները սովորեցին գործնականում արդյունավետ կիրառել ուսանողական ինքնակառավարման կարողություններն ու հմտությունները, իրականացնել խորհրդատվություն՝ ուսանողների իրավունքների, պարտականությունների և շահերի ոլորտը կարգավորող իրավական ակտերի վերաբերյալ։
Կոնֆերանսի մասնակիցներն արձանագրեցին, որ • երիտասարդությունը՝ մասնավորապես ուսանողությունը մեծամասամբ պասիվ է ու անտեսված,
• երիտասարդական պետական քաղաքականության դրսևորումները անորոշ են,
• ուսանողական ինքնակառավարման համակարգը ճգնաժամ է ապրում,
• բուհերը քաղաքականցված են,
• ուսանողների մասնակցությունը բուհերի կառավարմանը ձևական բնույթ է ստանում։
Կոնֆերանսի երկօրյա բանախոսությունների, վերլուծությունների և քննարկումների արդյունքում մասնակիցներն ու նախաձեռնության անդամները որոշեցին եռօրյա ժամկետում կազմել առաջարկությունների փաթեթ, որը կուղարկվի ՀՀ ԿԳՄՍՆ՝ ուսանողությանը հուզող խնդիրներին լուծում տալու և ուսանողական ինքնակառավարման երբեմնի դերն ու դերակատարումը վերականգնելու ակնկալիքով։
Արարող սերունդը շարունակելու է հանդես գալ որպես երիտասարդությանը՝ մասնավորապես ուսանողությանը միավորող կառույց, որը կստեղծի ուսանողների ինքնադրսևորման, ստեղծագործական, համագործակցային, հաղորդակցական կարողությունների ձևավորման և զարգացման հարթակ, կբացահայտի ու վեր կհանի ուսանողությանը հուզող խնդիրները, կնախանշի ու կգտնի դրանց լուծման ճանապարհները։
