A1News.am-Mediahub.am-ը գրում է. Նիկոլ Փաշինյանը միայնակ չի կարող բռնապետություն հաստատել, եթե նրան չաջակցեն տարբեր պաշտոնյաներ, պատգամավորներ, իշխանության հաստիքային ու արտահաստիքային հաճախորդներ։
«Բռնապետության դեմքը» խորագրի այսօրվա «հերոսը»՝ ՄԻՊ Քրիստինե Գրիգորյանն է, ով պատրաստ է փոխել սեփական դիրքորոշումները՝ հանուն Նիկոլ Փաշինյանի, նրա մասնավոր շահերի։
Ի՞նչ է պատահել
ՄԻՊ Քրիստինե Գրիգորյանը Ներքին Հանդի իրադարձությունների ժամանակ սկզբունքային դիրքորոշում էր հայտնել, ինչը մեր կողմից գոհունակությամբ արձանագրվել էր։ ՄԻՊ-ը հաստատել էր, որ ադրբեջանցի զինվորականները տեղակայվել են Ներքին Հանդի հարակից տարածքում: Նրա հայտարարության մեջ ասված է. «Ներքին Հանդի գերեզմանատան, Հայրենական պատերազմի զոհերի հիշատակին նվիրված հուշակոթողի և Շինատեղ կոչվող գյուղատեղիի հարակից բլրի վրա 2022-ի մարտի սկզբին ադրբեջանական զինված ուժերի տեղակայումը, այդ թվում՝ մի քանի վրանների տեղադրումը և իրենց դիրքերից թիկունք կառուցվող նոր ճանապարհները, նոր են»։
ՊՆ-ն, ըստ էության, ընդունում է տարածքի՝ Ադրբեջանի վերահսկողության տակ անցնելը, բայց ոչ թե այս տարվա մարտից, այլ նախորդ տարվա գարնանից: «Նախորդ տարի փորվել են խրամատներ, որոնք պատճաշ կահավորման բացակայության պատճառով ձմեռային պայմաններում պիտանի չեն եղել, նրանք հեռացել են և վերադարձել այս գարնանը»,- նշել են ՊՆ-ից։
Այս ամբողջ պատմության մեջ ուշագրավն այն է, որ նոր ՄԻՊ-ը փաստորեն «սխալ» էր հանել ՊՆ նախարար Սուրեն Պապիկյանին ու նրա ղեկավարած գերատեսչությանը։ ՄԻՊ-ի սկզբունքայնությունը, սակայն, կարճ տևեց։ Քրիստինե Գրիգորյանը «փորձում է փրկել իրավիճակը»՝ եթերից- եթեր գնալով, հարցազրույցներ տալով, թե իբրև մենք իրեն սխալ ենք հասկացել ու իր և ՊՆ-ի գնահատականների միջև որևէ հակասություն չկա։
Իրականում, ոչ թե մենք, այլ Փաշինյանն է «սխալ հասկացել» Քրիստինե Գրիգորյանին՝ նրանից պահանջելով սկզբունքային գտնվել՝ ոչ թե իրականությունը բացահայտելու, այլ իշխանության դեմքը փրկելու հարցում։
Թե ինչո՞ւ էր իշխանությանը պետք «սեփական» ՄԻՊ
Հիմա, թերևս, հասարակությանը պարզ է դառնում, թե ինչու էր նախկին ՄԻՊ Արման Թաթոյանը դարձել իշխանության «աչքի փուշը» ու ինչու էր Փաշինյանն ամեն գնով ուզում ունենալ իր «սրտի ՄԻՊ»-ին։ Փաշինյանն իր խնդիրը լուծել է, բայց սկանդալները չեն վերացել՝ դրանց դրսևորումն է փոխվել։
