A1News.am-Վերջին օրերին հասարակությունը քննարկում է ոստիկանների կողմից բերման ենթարկված քաղաքացու և նրա ընտանիքի հետ կապված միջադեպը, երբ ապօրինի շինությունը քանդելու նպատակով ոստիկանները մանկահասակ երեխաների աչքի առաջ բռնությամբ և դաժանորեն բերման էին ենթարկել նրանց հորը` Վազգեն Ռաֆայելյանին:
Հետագայում պարզվեց, որ Ռաֆայելյանի մանկահասակ երեխան, ականատես լինելով հոր նկատմամբ կիրառված դաժանությունը, առողջական խնդիրներ է ունեցել:
Հասարակությունը խիստ քննադատության էր ենթարկել ոստիկաններին, հասարակական-քաղաքական որոշ գործիչներ նույնիսկ պահանջեցին ոստիկանապետ Վահե Ղազարյանի հրաժարականը:
Խնդրին անմիջականորեն առնչվող Երևանի քաղաքապետարանը, որն էլ զբաղվում է ապօրինի կառուցապատման և շինությունների քանդման, օրինականացման և այլ հարցերով, այս խնդրում, թերևս, ամենամեծ մեղավորությունն ունենալով հանդերձ, լռում է:
Վերջին շրջանում քաղաքապետարանի կողմից նախաձեռնված նման աշխատանքները նոր թափ են ստացել, քանդվում, ավերվում են շինությունները, իսկ կառուցապատողները զրկվում են այն օրինականացնելու, վերականգնելու հնարավորությունից, քանի որ շինությունները ոչ թե ապամոնտաժվում, այլ քանդվում ու ավերվում են:
Նման հարցերի քննությունը պատկան մարմինների կողմից կարծես թե երկրորդական են դառնում նաև երեխաների իրավունքների պաշտպանության դեպքում: Կառուցապատողին բռնի բերման ենթարկելու ընթացքում հոգեբանական և առողջական խնդիրների հանգեցրած դեպքը չի հուզում ո՛չ «ոլորտային իրավապաշտպաններին», ո՛չ քաղաքապետարանի համապատասխան վարչությանը:
«AntiFake Զրույցի» շրջանակներում զրուցել ենք փաստաբան Հասմիկ Մարտիրոսյանի հետ, որը իրականացնում է Վազգեն Ռաֆայելյանի շահերի պաշտպանությունը:
Փաստաբանը մեզ հետ զրույցում մանրամասնել է, որ Կուրղինյան 3/15 հասցեում Վազգեն Ռաֆայելյանը կառուցել է ինքնակամ շինություն, որը հետագայում օրինականացնելու նպատակով դիմել է քաղաքապետարան: Այս ընթացքում Ռաֆայելյանը ենթարկվել է վարչական տույժի, տեղի է ունեցել նաև ինքնակամ շինության քանդում, որի վերաբերյալ որոշումը բողոքարկվել է:
Հոկտեմբերի 13-ին տեղի ունեցած քանդման աշխատանքների վերաբերյալ որոշում տեղում փաստաբանին տրամադրվել է առանց ստորագրության և կնիքի, առանց հասցեատիրոջ: Տեղում հավաքված ոստիկանները ևս հրաժարվել են բացատրություն տալ փաստաբանին իրենց գործողությունների վերաբերյալ:
Փաստաբանը ապօրինի կառույցների և ինքնակամ շինությունների վերաբերյալ իրավական կարգավորումների կիրառման հարցերում խնդիրներ է տեսնում` պնդելով, որ քաղաքապետարանը գործում է «գնանք, կքանդենք, դիտավորյալ գույքը կոչնչացնենք, հետո դատարաններով կպտտվենք»:
Այս ամբողջ ընթացքում Վազգեն Ռաֆայելյանը, փաստաբանի պնդմամբ, որևէ դիմադրություն ցույց չի տվել, իսկ վերջինիս երեխաները ներկա են եղել ամբողջ գործընթացին:
Որոշ ժամանակ անց ոստիկանները ուժի գործադրմամբ և քաշքշելով, վիրավորանքներով բերման են ենթարկել Վազգեն Ռաֆայելյանին: Այդ ընթացքում երեխաները ականատես են եղել իրենց հոր նկատմամբ անհամաչափ ուժի կիրառմանն ու խոշտանգմանը:
Վազգեն Ռաֆայելյանի 5-ամյա որդին տեղում ունեցել է անմիզապահություն, ամբողջ գիշերվա ընթացքում ցնցումներ է ունեցել, փսխել է:
«Եղել է սթրես, սպազմ, որի արդյունքում եղել են փսխումները, ստացել է առաջին բուժօգնությունը, հանգստացնողներ են ներարկվել: Իհարկե, մենք դիմել ենք հոգեբանի»,- մանրամասնում է Հասմիկ Մարտիրոսյանը` նկատելով, որ քաղաքապետարանի համապատասխան մարմինները, որոնք պատասխանատու են ստեղծված իրավիճակի համար, և որոնց պետք է հուզեր մանկահասակ երեխաների վիճակը, որևէ ձևով չեն կապվել ընտանիքի հետ, ավելին` երեխաներից նույնիսկ պաշտպանվում է քաղաքապետարանի խոսնակը:
Փաստաբանը նշում է, որ երեխաների հետ աշխատել են ՄԻՊ գրասենյակի աշխատակիցները: Փաստաբանը ընդգծում է, որ իրավապաշտպաններ Ռուբեն Մելիքյանը և Երվանդ Վարոսյանը, Արա Զոհրաբյանը առաջիններից են արձագանքել միջադեպին` հանրայնացնելով ու դատապարտելով ոստիկանության և պատկան մարմինների գործողությունները:
Փաստաբան Մարտիրոսյանը նշել է, որ հաղորդում է ներկայացրել դատախազություն, գրության օրինակ է ուղարկվել նաև Հատուկ քննչական ծառայություն:
«Մեղավորները պետք է պատժվեն: Մեղավորները պետք է լինեն երկուստեք. և՛ ոստիկանները, և՛ քաղաքապետարանի որոշ աշխատակիցներ: Մարդիկ, որոնք լիազորություն ունեն հրաման տալու, պետք է պատասխան տան կատարվածի համար: Ո՞վ է այն անձը, որ երեխաների մտքից ջնջելու է այդ տեսարանը»,- եզրափակել է փաստաբանը:
Հարցազրույցն ամբողջությամբ` տեսանյութում
Նյութը՝ AntiFake.am-ի
