A1News.am-Ռուսաստանի Բառնաուլ քաղաքում առևտրի կենտրոններից մեկի հարևանությամբ գտնվող մանկական փչովի բատուտը պոկվել, ապա օդ է բարձրացել՝ երեխաներից 2-ին նետելով տրամվայի գծերի վրա։
Պատահարի հետևանքով բատուտի վրա խաղացող երեխաներից մի քանիսը թեթև վնասվածքներ են ստացել, սակայն 3-ամյա Աննան և 4-ամյա Վիկան կյանքի և մահվան պայքար են մղում․ Աննան ուղեղի ցնցում և ողնաշարի կոտրվածք է ստացել, իսկ Վիկան՝ գանգի կոտրվածք, թոքերի և որովայնի շրջաններում վնասվածքներ:
«Բժիշկներն աղջիկների վիճակը գնահատում են ծանր և ծայրահեղ ծանր։ Ներկայում երեխաները բուժվում են ինտենսիվ թերապիայի բաժանմունքում», -«Կոմերսանտ» -ին հայտնել են առողջապահության նախարարությունից։
Ինչպես հաղորդվում է, անվտանգության պահանջներին չհամապատասխանող ծառայություններ մատուցելու վերաբերյալ Ռուսաստանի Քննչական կոմիտեի Ալթայի երկրամասի քննչական մարմինների կողմից քրեական գործ է հարուցվել։
Ըստ նախնական վարկածի՝ փչովի բատուտը պոկվել է ուժեղ քամու պատճառով։
