A1News.am-Hayeli.am-ը գրում է. Մեր ունեցած հավաստի տեղեկություններով՝ ԼՂՀ ՊԲ նախկին հրամանատար Սամվել Բաբայանը լքել է Անդրանիկ Քոչարյանի գլխավորած 44–օրյա պատերազմի հանգամանքներն ուսումնասիրող քննիչ հանձնաժողովը։
Ինչպես հայտնի է, Բաբայանը ներգրավվել էր այդ հանձնաժողովի աշխատանքներում որպես արտախորհրդարանական ուժերի ներկայացուցիչ և որպես ռազմական փորձագետ։
Այդ որոշումը կայացել էր Նիկոլ Փաշինյանի և այդ կուսակցությունների ձևաչափում։ Բաբայանը վերջին մի քանի հանդիպման չէր մասնակցել։ Հիմա էլ լքել է այդ հանձնաժողովը, որն ակնհայտորեն Նիկոլ Փաշինյանին արդարացնելու և պարտության մեղքն այլոց վրա բարդելու համար է ստեղծվել։
Բաբայանի լքելն այնքանով է ուշագրավ, որ քարոզչական մասով խնդիրներ են առաջացել։ Իշխանությունների հույսը Բաբայանի վրա էր։ Նրան նույնիսկ առանձին կաբինետ էին հատկացրել Ազգային ժողովում։ Մեզ հայտնի դարձավ, որ նա հանձնել է կաբինետի բանալիներն աշխատակազմին, գրավոր տեղեկացրել քննիչ հանձնաժողովի աշխատանքներին չմասնակցելու իր որոշման մասին ու հեռացել։
