A1News.am-Ճանապարհային ոստիկանության 2-րդ սպայական գումարտակի 6-րդ վաշտի հետաքննիչ Ավագյանի կողմից նյութեր են նախապատրաստվում հունիսի 3-ին Սյունիքի մարզում տեղի ունեցած խոշոր ավտովթարի փաստով։
Այդ օրը, ժամը 08։00-ի սահմաններում Կապան քաղաքի բնակիչ 21-ամյա Վիգեն Բալաչյանը իր վարած Opel Astra մակնիշի ավտոմեքենայով Երևան-Երասխ-Մեղրի ավտոճանապարհի 312 կմ հատվածում, դեռևս անհայտ հանգամանքներում, դուրս է եկել ճանապարհի երթևեկելի գոտուց, բախվել երկաթբետոնե արգելապատնեշներին և, մի քանի պտույտ գլորվելով, կողաշրջված վիճակում հայտնվել ձորում։
Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Վ․ Բալաչյանը մարմնական վնասվածքներով տեղափոխվել է Կապանի բժշկական կենտրոն։ Դեպքի վայր են ժամանել ՃՈ 2-րդ սպայական գումարտակի 6-րդ վաշտի 2-րդ դասակի ծառայողները՝ վաշտի հրամանատար Գեղամ Մարգարյանի գլխավորությամբ։
Ժամանել են նաև Ոստիկանության Կապանի բաժնի հերթապահ խումբը համայնքային ոստիկանության բաժանմունքի ավագ տեսուչ Ա․ Գրիգորյանի գլխավորությամբ։
Գ․ Շամշյանի տեղեկություններով՝ վարորդը աշխատում է «Աժդանակ» ՍՊԸ-ում։ © shamshyan.com
