A1News.am-Շվեյցարացի մոտոարշավորդ Ջեյսոն Դյուպասքյեն 19 տարեկան հասակում զոհվել է Իտալիայում՝ Մուջելլայում ընթացող խճուղային-օղակաձև մրցումների աշխարհի առաջնության որակավորման փուլում:
Մրցումների ժամանակ Դյուպասքյեն ընկել է մոտոցիկլից, իսկ ետևից սուրացող մրցակիցներից երկուսն անցել են նրա վրայով: Տուժածին ուղղաթիռով տեղափոխել են Ֆլորենցիայի հիվանդանոցներից մեկը, որտեղ նա ստացած վնասվածքներից մահացել է: Դյուպասքյեն PrustelGP թիմից էր և առաջնությունում երկրորդ մրցաշրջանն էր անցկացնում: Հինգ փուլից հետո նա անհատական հաշվարկում 27 միավորով 12-րդ տեղում էր:
Մուջելլայի ողբերգությունն առաջինն էր աշխարհի առաջնության խճուղային-օղակաձև մրցուղիներում՝ 2016 թվականից ի վեր, երբ Բարսելոնայում մարզումների ժամանակ զոհվել էր իսպանացի արշավորդ Լուիս Սալոմը:
