A1News.am-Չիայի սերմերն արդյունավետ սննդամթերք են արյան ճնշումը նվազեցնելու համար։ РИА Новости գործակալության փոխանցմամբ՝ այս մասին ասել է սննդաբան Օլգա Չունտոնովան։
Մասնագետի խոսքով, դա սուպերմթերք է, որը տարածված է առողջ ապրելակերպի կողմնակիցների շրջանում. այն մեծապես ազդում է սրտանոթային համակարգի վրա։
«Չիայի սերմերն ազդում են զարկերակային ճնշման վրա։ Սերմերի մեջ պարունակվող ճարպաթթուները կարող են նվազեցնել արյան մեջ խոլեստերինի մակարդակը, ինչը լավ կանխարգելում է աթերոսկլերոզը։ Մաքրելով անոթների պատերը աթերոսկլերոզային սալիկներից՝ սերմերը կանխում են սրտանոթային համակարգի հիվանդությունները։ Դրանց կազմի մեջ մտնում են մեծ քանակությամբ մագնեզիում և կալիում, որոնք ազդում են զարկերակային ճնշման ցուցանիշների վրա»,- ասել է Չունտոնովան։
Մասնագետը հավելել է, որ վերոնշյալ հատկանիշների շնորհիվ հիպերտոնիկ հիվանդներին խորհուրդ է տրվում սննդակարգում ավելացնել չիայի սերմեր։ Սակայն հիպոտոնիայի դեպքում դրանք օգտագործել խորհուրդ չի տրվում, որպեսզի արյան ճնշումն ավելի շատ չնվազի։