A1News.am-Ուկրաինայի նախագահ Վլադիմիր Զելենսկին հայտարարել է, որ պատրաստ չէ ուկրաինական տարածքները հանձնել Ռուսաստանին՝ հանուն խաղաղության և չի ցանկանում հայտնվել այնպիսի իրավիճակում, երբ կարող է նման հարց առաջանալ։ Այդ մասին պետության ղեկավարն ասել է CBS հեռուստաընկերության «60 րոպե» հաղորդմանը տված հարցազրույցում։
Նախագահին, մասնավորապես, հարցրել են՝ պատրա՞ստ է արդյոք հանուն խաղաղության հրաժարվել Ուկրաինայի ցանկացած հատվածից։
«Ընդհանուր առմամբ, մենք պատրաստ չենք զիջել մեր պետությունը, զիջել մեր տարածքները, ես ձեզ այսպես կպատասխանեմ՝ ես չէի ուզենա մտնել մի իրավիճակի մեջ, որ ստիպված լինեմ շատ լուրջ մտածել այդ մասին և իսկապես պատասխանել նման հարցի։ Ես դա իսկապես չէի ցանկանա, ես կարծում եմ, որ մենք արդեն շատ մարդկանց ենք տվել, և տվել ենք մեր պետությունը փրկելու համար, հետևաբար մենք առնվազն մեղավոր ենք նրանց առջև, հետևաբար, մենք պետք է կանգնենք այնքան, որքան կարող ենք: Բայց սա կյանք է, ամեն ինչ տարբեր ձեւով է լինում»,- ընդգծել է Զելենսկին:
Նա պարզաբանել է, թե բանակցություններում հնարավո՞ր է այս մասին պայմանավորվել։
«Դա (ուկրաինական տարածքների հարցը – ՈՒՆԻԱՆ) անպայման կբարձրացվի: Մենք հասկանում ենք ռուսական կողմին: Մենք հասկանում ենք, որ դա կետերից մեկն է, նրանք անընդհատ խոսում են դրա մասին. Ղրիմը ճանաչել որպես ռուսական տարածք: Եվ հետո, նրանք ուզում են լուծել Դոնբասի հարցը, և նրանց ախորժակը մեծացել է, նրանք ուզում են ամբողջ Դոնբասը, հետո նրանք ժամանակավորապես գրավեցին Խերսոնի շրջանը և հարավի մի մասը: Եվ մենք գիտենք, որ նրանք շատ են ցանկանում խլել մեր երկրի հարավը, հետևաբար, ես հստակ հասկանում եմ, թե ինչ հարցեր կառաջանան այս հանդիպմանը, եթե լինի, քանի որ մինչ այժմ հանդիպում չի եղել»,- ասել է նախագահը։
Նա հավելել է, որ Ուկրաինան պատրաստ չէ զիջել իր տարածքը։ «Եվ ես կարծում եմ, որ եթե մենք պատրաստ լինեինք, պատերազմ չէր լինի»,- ասել է Զելենսկին։
