A1News.am-Այսօր՝ հունիսի 15-ին, ողբերգական ավտովթար է տեղի ունեցել Արարատի մարզում։
Ժամը 01։40-ի սահմաններում Այգավան գյուղի բնակիչ՝ 43-ամյա Վահագն Սահակյանը իր վարած Opel մակնիշի ավտոմեքենայով Ոսկետափ-Երևան ճանապարհի հատման հատվածում դեռևս անհայտ հանգամանքներում դուրս է եկել ճանապարհի երթևեկելի գոտուց դեպի աջակողմյան հատված և կողաշրջվել։
Ինչպես հայտնում է ֆոտոլրագրող Գագիկ Շամշյանը, վթարի հետևանքով Վ. Սահակյանը տեղում մահացել է։ Նրա դին ավտոմեքենայից դուրս են բերել Արտակարգ իրավիճակների նախարարության փրկարար ծառայության Արարատի մարզային փրկարարական վարչության Արարատի հրշեջ-փրկարարական ջոկատից ժամանած հրշեջ-փրկարարները։
Վերջիններս ավտոմեքենան դարձի են բերել, որպեսզի կարողանան մահացածին տեղափոխեն պատգարակի վրա։
Դեպքի վայր են ժամանել ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ վաշտի հրամանատար Գրիգոր Պողոսյանի, դասակի հրամանատար Կարապետ Հարությունյանի գլխավորությամբ։
Վթարի մասին ՃՈ 1-77 օպերատիվ կառավարման կենտրոնի պետ Կարեն Գյուլումյանը տեղեկությունը փոխանցել է Հայաստանի քննչական կոմիտեի Արարատի մարզային քննչական վարչություն, որտեղից ժամանել է քննչական խումբը՝ ավագ քննիչ Զոհրաբյանի գլխավորությամբ, ում կողմից փաստի առթիվ նյութեր են նախապատրաստվում։
Քննիչի հանձնարարականով ավտոմեքենան տեղափոխվել է ոստիկանության Արարատի բաժնի պահպանվող հատուկ տարածք։
