A1News.am-Արցախում մահվան ելքով ճանապարհատրանսպորտային պատահար է գրանցվել: Այս մասին տեղեկացնում են ԱՀ ներքին գործերի նախարարությունից:
Նշվում է, որ դեկտեմբերի 27-ին՝ ժամը 20:30-ին, Մարտակերտի շրջանի Գետավանի տեղամասային հիվանդանոցից հաղորդում է ստացվել, որ ժամը 20:25-ին իրենց մոտ է տեղափոխվել Հարությունագոմեր համայնքի 20-ամյա բնակիչ Ռ. Մ.-ն՝ մարմնական տարբեր աստիճանի վնասվածքներով, իսկ նույն համայնքի 23-ամյա բնակիչ Ե. Ա.-ն՝ մահացած վիճակում:
Դեպքի վայր մեկնած ոստիկանության և քննչական կոմիտեի օպերատիվ խումբը պարզել է, որ նույն օրը՝ ժամը 20:00-ի սահմաններում, Ե. Ա.-ն, վարելով «Տոյոտա պրադո» մակնիշի ավտոմեքենան, Գետավան-Հարությունագոմեր ավտոճանապարհի 2-րդ կիլոմետրին դուրս է եկել ճանապարհի երթևեկելի գոտուց և բախվելով ճամփեզրի բետոնե արգելապատնեշին՝ կողաշրջվել, ինչի հետևանքով վերջինս տեղում մահացել է:
Նշանակվել է դիակի դատաբժշկական փորձաքննություն: Ստուգմամբ զբաղվում է ԱՀ քննչական կոմիտեն:
