A1News.am-Հունիսի 26-ին կյանքից հեռացել է ակնաբույժ, բժշկական գիտությունների թեկնածու, դոցենտ Սվետլանա Ալեքսանդրի Բախշինովան:
Սվետլանա Բախշինովան ծնվել էր 1936թ․-ի փետրվարի 20-ին՝ Թբիլիսիում։
1955թ․-ին ընդունվել է Երևանի պետական բժշկական համալսարան։
1961-ին ավարտել է այդ համալսարանի բուժական ֆակուլտետը։
1964-2020թթ․-ին աշխատել է «Քանաքեռ-Զեյթուն» բժշկական կենտրոնում՝ որպես ակնաբույժ, աչքի ֆունկցիոնալ հետազոտությունների լաբորատորիայի վարիչ։
Ակադեմիկոս Սուրեն Ավդալբեկյանի անվան առողջապահության ազգային ինստիտուտի ակնաբուժության ամբիոնի դոցենտ Սվետլանա Ալեքսանդրովնան երկար տարիներ զբաղվել է նաև դասախոսությամբ՝ կլինիկական օրդինատուրայի և բժիշկների վերապատրաստման շրջանակներում, միաժամանակ վերապատրաստել է Սովետական միության տարբեր քաղաքներից ժամանած ակնաբույժների։ Մասնակցել է վերապատրաստման բազում դասընթացների, այդ թվում՝ Գերմանիայի Էրֆուրտում անցկացվող միջազգային վեհաժողովին։
Ակտիվ զբաղվել է գիտական գործունեությամբ, բազմաթիվ նորարարական աշխատությունների հեղինակ է։
Հիպոկրատի երդմանը հավատարիմ Սվետլանա Ալեքսանդրովնան բուժանձնակազմի, իր հիվանդների հիշողության մեջ կմնա նախ՝ որպես մեծ մարդասեր ու սրտացավ անհատ, ապա նաև փորձառու և գիտակ բժշկուհի։
