A1News.am-Ատամի ցավը սովորաբար միշտ ասոցացվում է ատամների ու լնդերի հետ կապված խնդիրների հետ, սակայն որոշ դեպքերում այն կարող է հուշել ուռուցքի, այդ թվում նաև չարորակ ուռուցքի զարգացման մասին։ Այս մասին «Մոսկվա 24» հեռուստաալիքի հետ զրույցում նշել է ՌԴ առողջապահության նախարարության գլխավոր ատամնաբույժ Օլեգ Յանուշևիչը։
Մասնագետի խոսքով՝ առաջին հերթին չի կարելի անուշադրության մատնել վերին ծնոտի հատվածի ցավը, որը որոշ դեպքերում հուշում է հայմորյան խոռոչում չարորակ նորագոյացության զարգացման մասին։ Քաղցկեղի այս տեսակը կարող է ուղեկցվել ատամների հատվածում նկատվող տհաճ զգացողություններով, ուստի դրանք չի կարելի անտեսել։ Այս դեպքերում, իհարկե, խուճապի մատնվելու և նմանատիպ ատամի ցավը բացառապես ծանր հիվանդությունների հետ կապելու կարիք չկա, քանի որ այն կաևող է պայմանավորված լինել նաև հայմորիտով կամ զուտ ատամների խնդիրներով, սակայն ցավն այնուամենայնիվ անուշադրության մատնել չի կարելի։
Ինչ վերաբերում է եղանակային կամ մթնոլորտային ճնշման փոփոխություններին, ապա մասնագետը շեշտել է, որ նման դեպքերում որևէ տհաճ զգացողություններ չպետք է առաջանան, ուստի ատամի ցավի, հատկապես՝ երկարատև ցավի դեպքում հարկավոր է անպայման դիմել մասնագետին՝ ցավի պատճառը պարզելու և բուժումն սկսելու համար։ Եթե ատամներն ու լնդերն առողջ են, սակայն ցավը չի մեղմվում, ապա անհրաժեշտ է շատ ավելի լուրջ բուժզննում անցնել, որը կներառի արյան անալիզներ, ռենտգենյան հետազոտություն, համակարգչային շերտագրություն և նմանատիպ այլ պրոցեդուրաներ։
Հարկ է հիշել, որ ցանկացած ուռուցք շատ ավելի հեշտ է բուժվում զարգացման վաղ փուլերում։ Զարգացման առաջին ու երկրորդ փուլերում հայտնաբերված չարորակ ուռուցքների ճնշող մեծամասնությունը 90 տոկոս հավանականությամբ լիովին բուժվում է, մինչդեռ չափազանց խորանալու կամ մետաստազավորվելու դեպքում հիվանդության լիարժեք ապաքինման հավանականությունը շատ ցածր է լինում կամ առհասարակ բացակայում է։
