A1News.am-Սուրբ Զատկի տոնը քրիստոնյաների ամենասիրելի և սպասված տոնն է։ Այս օրվան ընդառաջ քրիստոնյաները լուրջ պատրաստություն են տեսնում։
Ձեզ ենք ներկայացնում, թե որո՞նք են զատկական ուտեստները և ինչ են դրանք խորհրդանշում։
ՁՈՒ
Ձուն հարության և նոր կյանքի սաղմնավորման խորհրդանիշն է։ Չնայած, որ մարդիկ ձվերը ներկում են տարբեր գույներով, սրանով ցուցադրելով իրենց ուրախությունը, սակայն եկեղեցին ասում է, որ զատկի ձուն պետք է ներկված լինի հիմնականում կարմիր գույնով։ Այն խորհրդանշում է Քրիստոսի արյունը, և կարմիր ներկված ձուն ցույց է տալիս, որ ողջ աշխարհը փրկվեց Քրիստոսի արյամբ:
Հավելենք, որ ձվի դեղնուցը խորհրդանշում է երկիրը, սպիտակուցը` ջրերը, թաղանթը՝ օդը, իսկ կեղևը խորհրդանշում է երկինքը:
ԳԻՆԻ
Գինին խորհրդանշում է Քրիստոսի արյունը:
ԿԱՆԱՉԻ, ՍՊԱՆԱԽ
Զատկի սեղանն առանց կանաչու անհնար է պատկերացնել, և հետևաբար այն դառնում է անբաժան՝ զատկի սեղանից։
ՁՈՒԿ
Ձուկը ևս զատկի սեղանի անբաժան մասն է։ Ձկան հետ են կապում Քրիստոսի հրաշքներից մեկը` ձկան ու հացի բազմապատկումն անապատում։
ՉԱՄԻՉՈՎ ԵՎ ԲՐՆՁՈՎ ՓԼԱՎ
Զատկական փլավի մեջ բրնձի հատիկները խորհրդանշում են մարդկությունը, չամչի հատիկները` առաքյալներին, ովքեր Քրիստոսի Ավետարանի քարոզությամբ քաղցրություն բերեցին մարդկային կյանքում։
Ժողովրդի մոտ կան կարծրացած մի շարք սովորություններ, որոնք ըստ եկեղեցու՝ սխալ են։
Ըստ նրանց եթե տանը մինչև Սուրբ Զատիկ ընտանիքի անդամներից մեկը մահացած է լինում, ապա տան անդամները ձու չեն ներկում, իսկ փլավը պատրաստում են առանց չամիչի, սակայն հենց այդ ընտանիքներում պիտի ներկվի ձուն, և պատրաստվի չամիչով փլավը, քանի որ ըստ եկեղեցու՝ զատկի ձուն՝ կյանքի հավերժության խորհրդանիշն է։
