A1News.am-Ապրիլի 7-ի առթիվ Աննա Հակոբյանը կրկին միջոցառում էր կազմակերպել՝ զոհված զինծառայողների կանանց, մայրերի և դուստրերի մասնակցությամբ։ Այս անգամ նա հրավիրյալների շրջանակը ընդլայնել էր՝ հրավիրելով տարբեր տարիներին հանուն Արցախի զոհված զինծառայողների մայրերին, նաև նրանց, որոնք տարբեր քաղաքական հայացքներ ունեն:
AntiFake.am–ի տեղեկություններով՝ զոհված զինծառայողների բազմաթիվ հարազատներ մեծ վրդովմունքով ու զայրույթով են վերաբերվել Աննա Հակոբյանի անունից արվող միջոցառմանը մասնակցելու հրավերին և մերժել են այն, իսկ ոմանք էլ կցանկանային մասնակցություն ունենալ, որ, իրենց խոսքով, այդ խայտառակ միջոցառման կազմակերպիչներին և ներկաներին իրենց զայրույթը տեղում հայտնեին և միջոցառման՝ խայտառակ լինելու փաստը արձանագրեին, սակայն նրանք այդպես էլ հրավեր չեն ստացել։
AntiFake.am-ը զրուցել է զոհված զինծառայողների բազմաթիվ մայրերի հետ՝ տեղեկանալու՝ արդյո՞ք նրանք հրավիրվել են ապրիլյոթյան միջոցառմանը մասնակցելու համար, և ինչ վերաբերմունք ունեն երևույթի վերաբերյալ:
Մեզ հետ զրույցում 44-օրյա պատերազմում զոհված Անդրեաս Անդրեասյանի մայրը` Վարսիկ Մարգարյանն ասաց, որ միջոցառմանը մասնակցելու հրավեր չի ստացել։
«Չեն հրավիրել, քանի որ մենք գյուղում ենք ապրում, ու ոչ մեկն այսքան ժամանակ մեզ չի հիշել։ Բայց ես, որ իմացա` զանգում են մայրերին, ճիշտն ասած՝ սպասում էի, որ պետք է ինձ էլ զանգեին, որովհետև ես շատ եմ ուզում հասնել իր տուն ու թքել իր երեսին, որովհետև ինքն ու իր ամուսինն իմ տղայի սպանության միակ մեղավորներն են։ Իրենք մեզ համար դավաճան են ու ներում չունեն։ Քանի որ մենք ուրիշ հնարավորություն չունենք իրենց մոտենալու՝ ես մտածում էի, որ միակ հնարավորությունը դա է իրեց հասնելու։ Բայց մեզ չզանգեցին»,- ասաց զոհվածի մայրը։
Միջոցառման ժամանակ տեղի ունեցած տգեղ իրավիճակի մասին, երբ զոհված զինծառայողների մայրերը տեղ չունենալու պատճառով ստիպված էին տուն վերադառնալ` Վարսիկ Մարգարյանը նկատեց. «հասնում է իրենց»։
