A1News.am-Ուկրաինայի նախագահ Վլադիմիր Զելենսկին հայտարարել է, որ Ռուսաստանի դեմ պատերազմում Ուկրաինայի հաղթանակից հետո իր առաջին արտասահմանյան այցերից մեկը կլինի այցը լեհական քաղաքներ, որոնք հատկապես շատ են օգնել Ուկրաինային։ Այս մասին Զելենսկին հայտարարել է Լեհաստանի նախագահ Անջեյ Դուդայի հետ համատեղ ճեպազրույցում, հայտնում են ուկրաինական զլմ-ները։
«Ցավոք սրտի, ես պատերազմի պատճառով այսօր հնարավորություն չունեմ գնալու որոշ քաղաքներ, որոնք կա՛մ որպես մարդասիրական կենտրոններ են եղել, կա՛մ զենքի մատակարարման կենտրոններ, կա՛մ գեղեցիկ քաղաքներ, որոնք ընդունել են մեր ժողովրդին, հատկապես կանանց, երեխաներին։ Ես հնարավորություն չունեմ գնալ և ուղղակի շնորհակալություն հայտնել այս մարդկանց և այս քաղաքներին, բայց ես վստահ եմ, որ մեր հաղթանակից հետո դրանք կլինեն առաջին քաղաքներից մեկը, որը ես հաճույքով կայցելեմ»,- ասել է Զելենսկին։
Նախագահը նաև նշել է, որ շատ են եղել պահերը, երբ ինքը և Անջեյ Դուդան զբաղվել են Ուկրաինային զինված աջակցության հարցերով, սակայն դրանց մասին դեռևս չի կարելի հրապարակայնորեն խոսել։
«Մենք երախտապարտ ենք Լեհաստանին, նրանք անընդհատ, ամեն օր աշխատել են, իսկ Լեհաստանի Հանրապետության նախագահն անձամբ է հատուկ դեր ունեցել զենքի մատակարարման գործում: Ուկրաինայի հաղթանակից հետո, ինչը նշանակում է մեր ընդհանուր հաղթանակը, մենք կկարողանանք հիշել շատ մանրամասներ, երբ մենք անընդհատ շփվել և անձամբ զբաղվել ենք Ուկրաինային այս կամ այն զինված աջակցության հարցերով… Սրանք իսկապես շատ դժվար պահեր էին, բայց հաճելի է հիշել, որ նման դժվարին պահերին մեր կողքին այսպիսի ընկերներ ունենք»,- ասել է Զելենսկին։
