Նոյեմբերի 26-ին ֆուտբոլի աշխարհի առաջնության երկրորդ տուրի շրջանակում մրցաշարի գլխավոր ֆավորիտներից մեկը՝ Արգենտինայի հավաքականը մրցելով Մեքսիկայի ընտրանու դեմ կարողացավ առաջին հաղթանակը գրանցել ընթացիկ առաջնությունում ու պահպանել շանսերը խմբային փուլի արգելքը հաղթահարելու հարցում։
Թեպետ հանդիպման ընթացքում երկու գոլ խփվեց, սակայն փաստ է, որ հանդիպման ելքը վճռվեց հենց Լեո Մեսսիի խփած ֆանտաստիկ գոլի շնորհիվ։ Մեսսին, հիշեցնենք, հեռահար հարվածով աչքի ընկավ հանդիպման 64-րդ րոպեին Անխել դի Մարիայի փոխանցումից հետո։ Եվ ահա Մեսսիի անվան շուրջ հերթական սկանդալն է հասունանում։
Բանն այն է, որ հանդիպման ավարտից հետո Մեսսին ու Մեքսիկայի հավաքականի ֆուտբոլիստներից մեկը փոխանակվել են մարզաշապիկներով։ Հետո համացանցում տեսանյութ տարածվեց, որում երևում էր, որ Արգենտինայի հավաքականի գործող լեգենդը գետնին է գցել Մեքսիկայի հավաքականի շապիկը, անգամ հրում է ոտքով։ Աշխարհահռչակ բռնցքամարտիկ, մեքսիկացի Սաուլ Ալվարեսը գրառում էր կատարել Մեսսիի քայլի հետ կապված, որում մասնավորապես ասվում էր․ «Մեսսին պիտի աղոթի, որ ես նրան չգտեմ»։
Նշենք, որ ողջ մարզաշխարհը այժմ սպասում է Մեսսիի արձագանքին տեղի ունեցողի հետ կապված, սակայն առայժմ արգենտինացին լուռ է։ Փոխարենը Մեսսիի երբեմնի խաղընկերներն են մեկը մյուսի հետևից անդրադառնում միջադեպին, փորձում արդարացնել «Ոսկե գնդակի» 7-ակի դեփնեկրին։
«Ձեզանից երևի շատերը չգիտեն, թե ինչ է իրականում կատարվում թիմերի հանդերձարաններում ընդմիջումներին ու խաղեր ավարտից հետո։ Հաճախ է ստացվում, որ ֆուտբոլիստների հանդերձարաններում մարզաշապիկներ են գետնին հայտնվում, քանի որ դրանք քրտնած են լինում։ Պետք չէ ամեն ինչի մեջ վատը փնտրել ու մեկնաբանել այնպես, ինչպես ձեզ է ձեռք տալիս։ Կխնդրեի ևս մեկ անգամ դիտել տեսանյութը ու ուշադրություն դարձնել այն դրվագին, որ իրականում Մեսսին փորձում է հանել խաղակոշիկը ու պատահմամբ է ոտքով դիպչում մեքսիկացիների մարզաշապիկին»,- գրել է Արգենտինայի հավաքականի նախկին խաղացող Սերխիո Ագուերոն՝ Դիեգո Մարադոնայի փեսան։
Մեսսիի նախկին թիմակից Սեսկ Ֆաբրեգասը նույնպես անդրադարձել է նոր սկանդալին՝ ուղիղ դիմելով մեքսիկացի բռնցքամարտիկին, որը սպառնացել էր Մեսսիին հաշվեհարդար տեսնել։
«Պետք է ֆուտբոլիստ եղած լինես, որ կարողանաս պատկերացում կազմել՝ ինչ է կատարվում ու ինչ կարող է կատարվել հանդերձարաններում հանդիպումներից հետո։ Հաճախ է ստացվում, որ հանդերձարաններում ֆուտբոլիստները մարզաշապիկները նետում են գետնին, նույնիսկ իրենք իրենց մարզաշապիկներն են նետում գետնին, քանի որ այն այդ վիճակում պիտանի չէ, միևնույնն է այն պետք է լվանալ»,- ասել է Ֆաբրեգասը։
