A1News.am-Կիպրոս կղզում կապիկի ծաղիկի առաջին դեպքն է գրանցել։ Այս մասին երեքշաբթի օրը՝ օգոստոսի 2-ին, հայտարարել է երկրի առողջապահության նախարարությունը։
Գերատեսչությունում պարզաբանել են, որ վարակվածը 40-ամյա տղամարդ է, նրա մոտ եղել են վարակի կլինիկական ախտանիշներ, հայտնում է RT-ն։
«Համապատասխան արձանագրություններն առաջին իսկ պահից իրականացվել են։ Տղամարդը հոսպիտալացվել է Նիկոսիայի հիվանդանոցի հատուկ տարածքում՝ նրա վիճակի դիտարկման և հետագա գնահատման համար»,- ասված է հաղորդագրության մեջ։
Ավելի վաղ հաղորդվել էր, որ Ռուսաստանում կապիկի ծաղիկով վարակված միակ հիվանդը դուրս է գրվել Սանկտ Պետերբուրգի հիվանդանոցից, գրում է Մոսկվա 24-ը։
Ռուսաստանում կապիկի ծաղիկի նոր դեպք դեռ չի հայտնաբերվել, հայտնում է aif.ru. կայքը։
Ավելի վաղ՝ օգոստոսի 2-ին, «Ռոսպոտրեբնադզորը» հայտնել էր, որ կապիկի ծաղիկի ծանր ընթացքի դեպքում հիվանդի մոտ կարող է առաջանալ գլխուղեղի բորբոքում (էնցեֆալիտ), իսկ երկրորդական բակտերիալ վարակի ընդհանրացման դեպքում՝ սեպսիս։
Քանի որ ցաները հայտնվում են նաև լորձաթաղանթների վրա, կարող են զարգանալ բերանի խոռոչի, ինչպես նաև շնչառական օրգանների վարակներ, մասնավորապես՝ թոքաբորբ։
Օգոստոսի 1-ին Կալիֆոռնիայի նահանգապետ Գևին Նյուսոմը նահանգում արտակարգ դրություն է հայտարարել վարակի տարածման պատճառով։ Դա արվել է նահանգում պատվաստումների ջանքերը կենտրոնացնելու համար, գրում է Reedus-ը։
Նյու Յորքի նահանգապետ Քեթի Հոկուլը հուլիսի 29-ից մինչև օգոստոսի 28-ը արտակարգ դրություն է հայտարարել կապիկի ծաղիկի բռնկման պատճառով։
