A1News.am-Թուրքիայի Իզմիր նահանգի Ֆոչի քաղաքի մոտակայքում 4,1 մագնիտուդ ուժգնությամբ երկրաշարժ է տեղի ունեցել։ Այս մասին փետրվարի 27-ին հայտնել է Hürriyet թերթը։
Աղետների և արտակարգ իրավիճակների կառավարման գրասենյակի տվյալներով՝ այն գրանցվել է Մոսկվայի ժամանակով 21:22-ին։ Երկրաշարժի օջախը գտնվել է 14,5 կմ խորության վրա։
Ավելի վաղ Թուրքիայի արևելքում գտնվող Մալաթիա նահանգում 5,6 մագնիտուդով երկրաշարժ էր տեղի ունեցել։ Երկրաշարժի օջախը գտնվել է 6,9 կմ խորության վրա։ Աղետի հետևանքով մեկ մարդ մահացել է, 69-ը՝ վիրավորվել։
Փետրվարի սկզբին 7,7 և 7,6 մագնիտուդ ուժգնությամբ ավերիչ երկրաշարժեր են տեղի ունեցել Թուրքիայի Քահրամանմարաշ նահանգում, որը գտնվում է երկրի հարավ-արևելքում՝ Սիրիայի սահմանի մոտ։ Վերջին տվյալներով՝ Թուրքիայում զոհերի թիվը գերազանցել է 44 հազարը, իսկ Սիրիայում տարերքի զոհ է դարձել ավելի քան 5,8 հազարը։
