A1News.am-Թալիբների՝ իշխանության գալուց հետո Աֆղանստանում սկսվել է մարդկության պատմության ամենածանր մարդասիրական աղետներից մեկը:
Մարդիկ բառի բուն իմաստով քաղցից վաճառում են իրենց երեխաներին: Որպես կանոն՝ ընտանիքում վաճառքի են հանվում աղջիկ երեխաները, քանի որ տղաների գնորդ երկրում չկա: RT Documentary-ի վավերագրական ֆիլմի հերոսները աղջիկներին վաճառքի հանած ընտանիքներ են ու վաճառքի հանված մանկահասակ երեխաները:
Նրանք արտասվում են՝ խնդրելով չվաճառել իրենց, քանի որ իրենք «մայրիկից ու հայրիկից բացի ոչ ոքի չեն սիրում»: ՄԱԿ-ի գլխավոր քարտուղարն ավելի վաղ կոչ էր արել միջազգային հանրությանը «մեծացնել աջակցությունը Աֆղանստանի ժողովրդին», մասնավորապես՝ ապասառեցնել Համաշխարհային բանկի և Միացյալ Նահանգների կողմից Վաշինգթոնում սառեցված միջոցները:
«Աֆղանստանցիների կեսից ավելին ծայրահեղ սովի մեջ է, որոշ ընտանիքներ վաճառում են իրենց երեխաներին սնունդ գնելու համար»,- զգուշացրել է Գութերեշը: ՄԱԿ-ում Չինաստանի դեսպան Չժան Ջունը նույնպես մեկնաբանել է այս ծայրահեղ իրավիճակը՝ նշելով, որ մի կին վաճառել է իր երկու դուստրերին և երիկամը, որպեսզի կարողանա կերակրել իր ընտանիքը։
ԱՄՆ-ն արգելափակել է Աֆղանստանի Կենտրոնական բանկի՝ մոտ 9,5 միլիարդ դոլարի (8,3 միլիարդ եվրո) պահուստները, ինչը համարժեք է 2020 թվականին երկրի համախառն ներքին արդյունքի (ՀՆԱ) կեսին: Արժույթի միջազգային հիմնադրամը (ԱՄՀ) և Համաշխարհային բանկը նույնպես դադարեցրել են իրենց գործունեությունն Աֆղանստանում՝ դադարեցնելով օգնությունը և ԱՄՀ-ի կողմից 300 միլիոն եվրոյի նոր պահուստները օգոստոսին:
