A1News.am-Պայթյունը տեղի է ունեցել շաբաթ օրը Շենյան քաղաքում (Չինաստանի հյուսիս-արեւելյան Լյաոնին նահանգի մայրաքաղաք) ավտոբուսում։ Huangqiu Shibao թերթի փոխանցմամբ՝ մի քանի ուղեւոր վնասվածքներ է ստացել, փոխանցում է ՏԱՍՍ-ը։
Պայթյունը գրանցվել է տեղական ժամանակով 17:52-ին, երբ ավտոբուսը գտնվել է Հուանգու թաղամասում՝ Հուանգհե դացզ պողոտայի եւ Նինշանլու փողոցի խաչմերուկում։ Պայթյունի ալիքը կոտրել է պատուհանները եւ վնասել ավտոբուսի երեսվածքը։ Ականատեսների կողմից նկարահանված տեսանյութերում երեւում է առնվազն երկու արյունոտ տղամարդ:
Ոստիկանության տվյալներով՝ մեկ մարդ մահացել է, 42-ը՝ վիրավորվել։ «Վերջին տվյալներով՝ պայթյունի հետեւանքով մեկ մարդ մահացել է, երկուսը ծանր վիրավորվել են, եւս 40 մարդ թեթեւ վնասվածքներ է ստացել։ Տուժածները հոսպիտալացվել են»,- ասվում է քաղաքի ոստիկանության հաղորդագրության մեջ։
Միջադեպի կապակցությամբ հետաքննություն է սկսվել:
