A1News.am-Էվբեյա կղզում և Աթենքի արվարձաններում բռնկված հրդեհները ավերել կամ վնասել են ավելի քան 200 տուն: Այս մասին հայտնում է Greek Reporter-ը։
Հրշեջ ծառայության շուրջ հարյուր աշխատակիցներ միջոցներ են ձեռնարկում հրդեհները տեղայնացնելու ուղղությամբ: Տարհանման կարգադրություն են ստացել երեք գյուղերի բնակիչները։
Բացի այդ, մարդկանց կոչ են արել տեղափոխվել Իսթիեա քաղաք կղզու հյուսիսարևմտյան ափին։ Ընդամենը վերջին մեկ օրում հաջողվել է տարհանել ավելի քան 10 գյուղ։
Միևնույն ժամանակ Էվբեյայում բռնկումների օջախների թիվը շարունակում է աճել։ Լիմնի քաղաքի փոխմարզպետ Արգիրիս Լիասկոսը կոչ է արել ակտիվացնել օդային հակահրդեհային ուժերը, քանի որ կրակը շարունակում է անվերահսկելի տարածվել:
Վարիմպոպիում հրդեհից լրջորեն տուժել է ավելի քան 70 տուն: Իշխանություններն ընդգծում են, որ արվարձանում հրդեհների հետ կապված իրավիճակը բարելավվում է հրշեջների ջանքերի շնորհիվ:
Հունաստանի քաղաքացիների պաշտպանության հարցերով փոխնախարար Նիկոս Հարդալիասը հայտարարել է, որ երեքշաբթի օրվանից ամբողջ երկրում գրանցվել է հրդեհի ավելի քան 40 նոր օջախ:
