A1News.am-Ֆրանսիայի նախագահի թեկնածու Մարին Լը Պենի փարիզյան մամուլի ասուլիսի ընթացքում ներկաներից մեկին անվտանգության ծառայության աշխատակիցները հատակով քարշ տալով դուրս են բերել սրահից այն բանից հետո, երբ կինը վեր է բարձրացրել Լը Պենի և ՌԴ նախագահ Վլադիմիր Պուտինի «ռոմանտիկ» պաստառը:
Ինչպես գրում է Daily Mail-ը, սրտաձև կտրված պաստառում պատկերված են Լը Պենն ու Պուտինը: Համապատասխան լուսանկարն արվել է 2017-ին, երբ ֆրանսուհին այցելել էր Մոսկվա:
Ավելի ուշ ակտիվիստուհին նշել է, որ տվյալ ակցիայի միջոցով փորձել է ևս մեկ անգամ մարդկանց ուշադրությունը հրավիրել այն փաստին, որ «Լը Պենը սերտ համագործակցել է Պուտինի հետ և որ աջակցում է բռնապետերին»:
«Ուզում էինք հիշեցնել, որ Մարին Լը Պենը որպես նախագահ նույն դիրքորոշումը չի ունենա Ուկրաինայի, Ռուսաստանի նկատմամբ, որը մենք ունենք այսօր։ Պետք է հիշել, թե ինչ վտանգ է ներկայացնում Ազգային ճակատը»,-ասել է ակտիվիստուհին։
Հիշեցնենք, որ Լը Պենն ավելի վաղ հայտնել էր, որ նախագահ ընտրվելու դեպքում Ֆրանսիան դուրս կբերի ՆԱՏՕ-ից և ավելի սերտ հարաբերություններ կհաստատի ՌԴ-ի հետ:
Ֆրանսիայում նախագահական ընտրությունների երկրորդ փուլը, որում մրցելու են Լը Պենն ու գործող նախագահ Էմանուել Մակրոնը, կայանալու է ապրիլի 24-ին: