A1News.am-Ռուսաստանի պաշտպանության նախարարությունը հրապարակել է Ուկրաինայի Ազգային գվարդիայի հրամանատարի 2022թ․ հունվարի 22-ի գաղտնի հրամանն այս տարվա մարտին Դոնբասի դեմ հարձակման վերաբերյալ։
Այս մասին լրագրողներին հայտնել է ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը, հաղորդում է ՏԱՍՍ-ը։ «Ռուսաստանի պաշտպանության նախարարությունը հրապարակում է Ուկրաինայի Ազգային գվարդիայի հրամանատար, գեներալ-գնդապետ Նիկոլայ Բալանի՝ 2022թ․ հունվարի 22-ի գաղտնի հրամանի բնօրինակը։
Հրաման «Ուկրաինայի զինված ուժերի բրիգադի կազմում մարտական (հատուկ) առաջադրանքներ կատարելու համար 4-րդ օպերատիվ նշանակության բրիգադի գումարտակային մարտավարական խմբի նախապատրաստում կազմակերպելու մասին։ Փաստաթուղթը հասցեագրված է Ուկրաինայի ազգային գվարդիայի՝ հյուսիսային Կիեւի, հարավային Օդեսայի եւ արեւմտյան տարածքային վարչությունների ղեկավարներին»,- ասել է Կոնաշենկովը։
Գեներալն ընդգծել է, որ «փաստաթղթում կան Ուկրաինայի ազգային գվարդիայի հրամանատարության առաջադրանքները կատարելու համար պատասխանատու պաշտոնյաների ստորագրություններ»։ Նրա խոսքով՝ «հրամանագրում մանրամասն նկարագրված է Դոնբասում այսպես կոչված «Միավորված ուժերի գործողության» գոտում հարձակողական գործողությունների համար հարվածային խմբերից մեկի նախապատրաստման ծրագիրը»։
«Փաստաթուղթը հաստատում է Ազգային գվարդիայի 4-րդ օպերատիվ բրիգադի գումարտակային մարտավարական խմբի կազմակերպչական-անձնակազմային կառուցվածքը, դրա համակողմանի աջակցության կազմակերպումը եւ վերաենթակայությունը Ուկրաինայի 80-րդ առանձին դեսանտագրոհային բրիգադին։ Ուզում եմ նշել, որ 2016թ․Ուկրաինայի դեսանտագրոհային զորքերի տվյալ միավորումը կազմակերպվել է ամերիկացի եւ բրիտանացի հրահանգիչների կողմից Լվովում «ՆԱՏՕ-ի ստանդարտներ» ծրագով»,- ընդգծել է ՌԴ ՊՆ պաշտոնական ներկայացուցիչը։
Նրա խոսքով՝ «համաձայն հրամանի՝ Ազգային գվարդիայի հրամանատարի տեղակալին հանձնարարվել է փետրվարի 7-28-ը կազմակերպել Ազգային գվարդիայի գումարտակային-մարտավարական խմբի մարտական համակարգումը Ուկրաինայի զինված ուժերի 80-րդ առանձին դեսանտագրոհային բրիգադի կազմում»:
Կոնաշենկովի խոսքով՝ Ազգային գվարդիայի հրամանատարի՝ անձնակազմի գծով տեղակալին հանձնարարվել է կազմակերպել «4-րդ օպերատիվ նշանակության բրիգադի գումարտակային մարտավարական խմբին բարոյահոգեբանական աջակցության արդյունավետ համակարգ, հրամանատարների ներքին հաղորդակցություն ենթակաների հետ, իրազեկում»։
«Հատուկ ուշադրություն եմ հրավիրում այն փաստի վրա, որ հրամանի 12-րդ կետն արգելում է մարտական տարածք ուղարկել հոգեբանական թեստավորման «անբավարար» արդյունքներ ցույց տված ազգային գվարդիականներին»,- ասել է գեներալը։
Նա ընդգծել է, որ հրամանի համաձայն՝ «ազգայնականների մարտական համակարգման բոլոր միջոցառումները հրամայվել են ավարտին հասցնել մինչեւ փետրվարի 28-ը՝ Դոնբասում ուկրաինական «Միավորված ուժերի գործողության» շրջանակում մարտական առաջադրանքների կատարումը հետագայում ապահովելու համար»։
