A1News.am-Ուկրաինան չի բացառում, որ Բելառուսի վրա կանխարգելիչ հարվածկհասցնի, քանի որ կան տարածքներ, որտեղ տեղակայված են ռուսական զորքերը, երեքշաբթի ասել է Ուկրաինայի Ազգային անվտանգության և պաշտպանության խորհրդի քարտուղար Ալեքսի Դանիլովը, փոխանցում է ТАСС լրատվական գործակալությունը։
«Ուկրաինա-24» հեռուստաալիքի եթերում՝ պատասխանելով այն հարցին, թե արդյոք Ուկրաինան կարող է կանխարգելիչ հարված հասցնել Բելառուսին, նա ասել է․«Անհրաժեշտության դեպքում, եթե Գերագույն գլխավոր հրամանատարը որոշում կայացնի դրա մասին»։ Բելառուսի զինված ուժերը չեն մասնակցում Ուկրաինայում ռազմական գործողություններին և չեն պատրաստվում դա անել ապագայում, երեքշաբթի հայտարարել է նախագահ Ալեքսանդր Լուկաշենկոն երկրի Անվտանգության խորհրդի նիստում:
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։ «Հանգամանքները մեզնից պահանջում են վճռական ու անհապաղ գործողություններ
: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:
Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։ Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։
