A1News.am-ՌԴ Կեմերովոյի նահանգի նահանգապետ Սերգեյ Ցիվիլևը հայտնել է, որ «Լիստվյաժնայա» ձեռնարկությունում արտակարգ պատահարը 11 հանքափորի կյանք է խլել, հաղորդում է «РИА Новости» գործակալությունը։
Բելովո հանքավայրում ծուխ է առաջացել տեղի ժամանակով առավոտյան ժամը 8։30-ին։ Այդ պահին գետնի տակ 285 մարդ է եղել։ Նրանց մեծ մասին դուրս են բերել։ Ենթադրվում է, որ մնացած հանքափորներն արգելափակված են երկու հեռավոր խոռոչներում. նրանց հետ կապ չկա։
Դեպքի վայրում աշխատում է փրկարարների 19 ստորաբաժանում և 30 միավոր հատուկ տեխնիկա։
Հանքահորը պատկանում է «СДС-Уголь» հոլդինգին, որը մտնում է Ռուսաստանի ածուխ արտադրողների առաջատար եռյակի մեջ։
Գործակալությունը հաղորդում է, որ ընկերությունն օգնություն կտրամադրի զոհերի ընտանիքներին։
Զոհերի հարազատներին ցավակցություններ է հայտնել ՌԴ նախագահ Վլադիմիր Պուտինը։